Breytingar á aðstöðunni í Fontana fela meðal annars í sér nýja sánu, endurbætur á búningsklefum, laugar sem teygja sig að vatninu og nýja hveragufu beint yfir kröftugri uppsprettunni. Breytingunum er ætlað að upphefja sögu svæðisins og náttúruna í kring.

Böð í heitum uppsprettum Laugarvatns eiga sér langa sögu og árið 1929 byggði heimafólk á Laugarvatni tvö baðhús beint yfir kröftugum hvernum. Staðsetning nýju gufunnar í Fontana vísar einmitt til þessarar sögu. Hvelfing hveragufunnar er magnað rými þar sem hverinn sjálfur er miðpunktur. Vatnið kraumar undir fótum þér og gufan stígur upp með sinni einkennandi lykt, yljandi mistri og taktfasta hljóði.